§ No mundo rural as festas patronais
seguen a ter un significado importante na vida da comunidade, das familias, das
persoas, por moi diferentes motivos.
§ Tamén
desde un punto de vista relixioso é algo que se vive con certa intensidade. Non
tanto coma o relativo ao mundo funerario ou aos santuarios, pero segue a ter
peso.
§ Hai
xente que habitualmente non vai á Misa e que ese día se deixa caer pola igrexa.
Ademais é frecuente que case haxa máis xente da invitada de fóra da parroquia ca
da mesma parroquia.
§ Todo
isto pensamos que sería ben que nos levase a coidar especialmente as
celebracións das festas patronais, en clave de misión: actitude acolledora, linguaxe
empregada, textos que se proclaman, imaxe de Deus que se transmite, unir a experiencia
relixiosa cos acontecementos reais da parroquia, acompañar cara a diante a
relixiosidade popular, actitude inclusiva (que todo o mundo que asista
experimente que por algo ten sentido a súa presenza na celebración, e non que
acabe sentindo e dicindo: que pinto eu aquí).
§ Desde
hai xa ben anos na parroquia de Candia, en Abadín, coidamos especialmente a
celebración das festas patronais, S. Pedro e Sta. Sabela, o primeiro fin de
semana de xullo, sábado e domingo. Comentámosvos algunhas cousas que facemos e
tamén incorporamos algún material do que botamos man. Son cousas normais, de
ton ben popular, coas que quixemos axudar a facer da celebración algo
meritorio, que chegue á xente, que se lle quede no recordo.
§ Faremos
un recorrido por anos sucesivos, presentando cousas particulares que cada un
deses anos fomos facendo.
§ Sabemos
que vai algo así coma un caixón de xastre; pero nunha ollada rápida, o que teña
interese poderá ver se algo lle pode resultar útil ou non, ou se algo do que ve
lle pode dar pé a pensar noutras cousas adaptadas á realidade da súa parroquia.
Se en algo vos pode axudar, pois estupendo, ese é a nosa humilde pretensión. E
se por casualidade pensades que en algo (elaboración dalgún material concreto,
por exemplo) vos podemos axudar, pois aquí estamos á vosa disposición no que
poidamos.
NOTA: COMO HAI MOITO PARA COMPARTIR,
IREMOS POÑENDO O MATERIAL AOS POUCOS